ಶ್ರೀ ಗುರುಭ್ಯೋ ನಮಃ । ಹರಿಃ ಓಂ ॥
ಗ॒ಣಾನಾಂ᳚ ತ್ವಾ ಗ॒ಣಪ॑ತಿಂ ಹವಾಮಹೇ
ಕ॒ವಿಂ ಕ॑ವೀ॒ನಾಮು॑ಪ॒ಮಶ್ರ॑ವಸ್ತಮಮ್ ।
ಜ್ಯೇಷ್ಠ॒ರಾಜಂ॒ ಬ್ರಹ್ಮ॑ಣಾಂ ಬ್ರಹ್ಮಣಸ್ಪತ॒
ಆ ನ॑: ಶೃ॒ಣ್ವನ್ನೂ॒ತಿಭಿ॑ಸ್ಸೀದ॒ ಸಾದ॑ನಮ್ ॥
॥ ಮಹಾಗಣಪತಯೇ ನಮಃ ॥
ಜೀವನ ಸೂತ್ರಕ್ಕೆ ಸುಸ್ವಾಗತ.
ಶರೀರಮಾದ್ಯಂ ಖಲು ಧರ್ಮಸಾಧನಮ್ ಎಂಬ ಹಳೆಯ ಮಾತೊಂದಿದೆ. ಯಾವ ಸಾಧನೆಗೂ ಮೊದಲ ಸಾಧನ ಈ ದೇಹವೇ ಎಂದು ಅದರ ಅರ್ಥ. ಸಾಧನ ಸರಿಯಿಲ್ಲದಿದ್ದರೆ ಸಾಧನೆ ಎಲ್ಲಿಂದ ಬರಬೇಕು?
ಆದರೆ ಪ್ರಶ್ನೆ ಅಲ್ಲಿಗೆ ನಿಲ್ಲುವುದಿಲ್ಲ. ದೇಹ ಸರಿಯಿದ್ದರೆ ಸಾಕೇ? ಎಲ್ಲ ರಿಪೋರ್ಟ್ಗಳೂ ಸರಿಯಾಗಿದ್ದೂ ಸಹ ನೆಮ್ಮದಿ ಇಲ್ಲದವರನ್ನು ಆಸ್ಪತ್ರೆಯಲ್ಲಿ ದಿನವೂ ನೋಡಬಹುದು. ಇನ್ನೊಂದು ಕಡೆ, ಗಂಭೀರ ಕಾಯಿಲೆ ಹೊತ್ತುಕೊಂಡೂ ಮುಖದಲ್ಲಿ ಸಮಾಧಾನ ಉಳಿಸಿಕೊಂಡವರೂ ಇದ್ದಾರೆ.
ಈ ಎರಡು ಜಗತ್ತುಗಳನ್ನು ಒಂದೇ ಪುಟದಲ್ಲಿ ಇಡುವ ಸಣ್ಣ ಪ್ರಯತ್ನವೇ ಜೀವನ ಸೂತ್ರ.
ಈ ಜಾಲತಾಣದ ಉದ್ದೇಶ
ವಿಜ್ಞಾನವನ್ನು ಒಂದು ಕೋಣೆಯಲ್ಲಿ, ಅಧ್ಯಾತ್ಮವನ್ನು ಇನ್ನೊಂದು ಕೋಣೆಯಲ್ಲಿ ಕೂರಿಸಿ ನಾವು ಬಾಗಿಲು ಹಾಕಿಬಿಟ್ಟಿದ್ದೇವೆ. ಇದರಿಂದ ಎರಡೂ ಕಡೆಯವರಿಗೆ ನಷ್ಟವೇ.
ವೈದ್ಯಕೀಯ ವಿಜ್ಞಾನ ದೇಹದ ಪ್ರಶ್ನೆಗೆ ಉತ್ತರ ಕೊಡುತ್ತದೆ. ಬದುಕಿಗೆ ಅರ್ಥ ಬೇಕಾದ ಕ್ಷಣದಲ್ಲಿ ಅದು ಸುಮ್ಮನಾಗುತ್ತದೆ. ವೇದಾಂತ ಅರ್ಥವನ್ನು ಕೊಡುತ್ತದೆ. ಆದರೆ ಎದೆನೋವು ಬಂದಾಗ ಅದು ಇಸಿಜಿ ಮಾಡುವುದಿಲ್ಲ.
ಎರಡೂ ಬೇಕು. ಯಾವುದನ್ನೂ ಇನ್ನೊಂದರ ಬದಲಿಗೆ ಬಳಸಬಾರದು ಎನ್ನುವುದೇ ಇಲ್ಲಿನ ಮೊದಲ ನಿಯಮ.
ಇಲ್ಲಿ ಏನಿದೆ?
- ಮಂತ್ರ ನಿಧಿ: ವೇದ ಸೂಕ್ತಗಳು, ಸಹಸ್ರನಾಮ ಮತ್ತು ನಾಮಾವಳಿಗಳು, ಸ್ತೋತ್ರಗಳು ಮತ್ತು ನಿತ್ಯ ಪಾರಾಯಣದ ಮಂತ್ರಗಳು. ಪಠಿಸಲು ಬೇಕಾದ ಪಾಠವನ್ನು ಸಾಧ್ಯವಾದಷ್ಟು ನಿಖರವಾಗಿ ಕೊಟ್ಟಿದ್ದೇವೆ. ಭಿನ್ನ ಪಾಠಗಳಿರುವಲ್ಲಿ ಎರಡೂ ಆವೃತ್ತಿಗಳನ್ನು ದಾಖಲಿಸಿದ್ದೇವೆ.
- ಗ್ರಂಥ ಯಾತ್ರೆ: ಇಡೀ ಗ್ರಂಥವನ್ನು ಒಂದೊಂದೇ ಶ್ಲೋಕವಾಗಿ ಓದುತ್ತಾ ಹೋಗುವ ಸರಣಿಗಳು. ಸದ್ಯಕ್ಕೆ ಸೌಂದರ್ಯ ಲಹರೀ ಮತ್ತು ಭಗವದ್ಗೀತೆ ಇವೆ. ಇಲ್ಲಿ ಪದಶಃ ಅರ್ಥ ಮತ್ತು ಸಂಪೂರ್ಣ ಅರ್ಥ ಎರಡೂ ಇರುತ್ತವೆ.
- ವಿಚಾರ ಲಹರಿ: ದೇಹ, ಮನಸ್ಸು ಮತ್ತು ದರ್ಶನ ಒಂದನ್ನೊಂದು ಮುಟ್ಟುವ ಜಾಗಗಳ ಬಗ್ಗೆ ಬರಹಗಳು. ಆಚರಣೆಯ ಹಿಂದಿನ ಕಾರಣ, ಪದವೊಂದರ ಮರೆತುಹೋದ ಅರ್ಥ, ದಿನಚರಿ ಮತ್ತು ಆರೋಗ್ಯ, ವೃದ್ಧಾಪ್ಯದ ಘನತೆ.
ಯಾವ ಪುಟದಲ್ಲೂ ಯಾವುದೇ ಆಚರಣೆಯನ್ನು ಚಿಕಿತ್ಸೆಗೆ ಬದಲಾಗಿ ಸೂಚಿಸುವುದಿಲ್ಲ. ಕಾಯಿಲೆಯ ವಿಷಯದಲ್ಲಿ ನಿಮ್ಮ ವೈದ್ಯರ ಮಾತೇ ಕೊನೆಯದು.
ಲಾಂಛನದ ಅರ್ಥ
ಭಗವದ್ಗೀತೆಯ ಏಳನೆಯ ಅಧ್ಯಾಯದಲ್ಲಿ ಒಂದು ಸಾಲಿದೆ: ಮಯಿ ಸರ್ವಮಿದಂ ಪ್ರೋತಂ ಸೂತ್ರೇ ಮಣಿಗಣಾ ಇವ. ದಾರದಲ್ಲಿ ಮಣಿಗಳಂತೆ ಇದೆಲ್ಲವೂ ನನ್ನಲ್ಲಿ ಪೋಣಿಸಿಕೊಂಡಿದೆ ಎಂದು ಅದರ ಅರ್ಥ. ಈ ತಾಣದ ಹೆಸರೂ ಲಾಂಛನವೂ ಅಲ್ಲಿಂದಲೇ ಬಂದವು.
ಲಾಂಛನದಲ್ಲಿ ಇರುವುದು ಒಂದೇ ದಾರ. ಅದು ಮಾಲೆಯಂತೆ ಮುಚ್ಚಿಕೊಂಡಿದೆ. ಅದರ ಮೇಲೆ ಮೂರು ಮಣಿಗಳು. ಮಣಿಗಳು ಬೇರೆ ಬೇರೆ. ಆದರೆ ದಾರ ಒಂದೇ. ಈ ತಾಣದ ಮೂರು ಭಾಗಗಳನ್ನೂ ಹಾಗೆಯೇ ಜೋಡಿಸಿದ್ದೇವೆ.
ಮೇಲಿನ ಮಣಿ ಮಂತ್ರ ನಿಧಿ. ಎಡಗಡೆ ಕೆಳಗಿನದು ಗ್ರಂಥ ಯಾತ್ರೆ. ಬಲಗಡೆ ಕೆಳಗಿನದು ವಿಚಾರ ಲಹರಿ. ಪ್ರತಿಯೊಂದಕ್ಕೂ ಅದರದೇ ಆದ ಬಣ್ಣ ಕೊಟ್ಟಿದ್ದೇವೆ. ಆ ಭಾಗದ ಪುಟಗಳೂ ಅದೇ ಬಣ್ಣವನ್ನು ಹೊತ್ತಿರುತ್ತವೆ. ಮಣಿಗಳ ಕ್ರಮ ಎಲ್ಲಿಯೂ ಬದಲಾಗುವುದಿಲ್ಲ.
ಕೆಳಗೆ ಒಂದು ಗಂಟು ಮತ್ತು ಕುಚ್ಚು. ಜಪಮಾಲೆಯ ಮೇರುವಿನಂತೆ, ಆರಂಭ ಮತ್ತು ಕೊನೆ ಸೇರುವ ಜಾಗ ಅದು.
ಸೂತ್ರ ಎಂದರೆ ದಾರ. ಸೂತ್ರ ಎಂದರೆ ಕಡಿಮೆ ಮಾತಿನಲ್ಲಿ ಹಿಡಿದಿಟ್ಟ ತತ್ವವೂ ಹೌದು. ಎರಡೂ ಅರ್ಥಗಳು ಇಲ್ಲಿ ಬೇಕು.
ಲೇಖಕರ ಬಗ್ಗೆ
ವೃತ್ತಿಯಲ್ಲಿ ವೈದ್ಯ. ಪ್ರವೃತ್ತಿಯಲ್ಲಿ ಸನಾತನ ಧರ್ಮದ ವಿದ್ಯಾರ್ಥಿ. ಆಸ್ಪತ್ರೆಯ ಜವಾಬ್ದಾರಿಗಳ ನಡುವೆ ಉಳಿಯುವ ಸಮಯದಲ್ಲಿ ಬರೆದದ್ದು ಇಲ್ಲಿದೆ.
ದೇಹಕ್ಕೆ ಚಿಕಿತ್ಸೆ ಕೊಡುವ ವಿಜ್ಞಾನ ಮತ್ತು ಮನಸ್ಸಿಗೆ ಸಂಸ್ಕಾರ ಕೊಡುವ ಪರಂಪರೆ, ಎರಡೂ ಸೇರಿದಾಗ ಮಾತ್ರ ಮನುಷ್ಯ ಪೂರ್ಣನಾಗುತ್ತಾನೆ ಎನ್ನುವ ನಂಬಿಕೆ. ಇಲ್ಲಿನ ಬರಹಗಳು ನಿಮ್ಮ ದಿನನಿತ್ಯದ ಜಂಜಾಟದ ನಡುವೆ ಒಂದಿಷ್ಟು ಸ್ಪಷ್ಟತೆಯನ್ನು ಕೊಟ್ಟರೆ ಸಾಕು.
ನಿಧಾನವಾಗಿ ಓದಿ. ಆತುರವಿಲ್ಲ.
ಸರ್ವೇ ಜನಾಃ ಸುಖಿನೋ ಭವಂತು.