ನಕ್ಷತ್ರ ಸೂಕ್ತ: ಇಪ್ಪತ್ತೇಳು ನಕ್ಷತ್ರಗಳಿಗೂ ಒಂದೊಂದು ಮಂತ್ರ

अ॒ग्निर्न॑ः पातु॒ कृत्ति॑काः ।
नक्ष॑त्रं दे॒वमि॑न्द्रि॒यम् ।
इ॒दमा॑सां विचक्ष॒णम् ।
ह॒विरा॒सं जु॑होतन ।
यस्य॒ भान्ति॑ र॒श्मयो॒ यस्य॑ के॒तव॑ः ।
यस्ये॒मा विश्वा॒ भुव॑नानि॒ सर्वा᳚ ।
स कृत्ति॑काभिर॒भिसं॒वसा॑नः ।
अ॒ग्निर्नो॑ दे॒वस्सु॑वि॒ते द॑धातु ॥ 1 ॥

ರೋಹಿಣೀ

प्र॒जाप॑ते रोहि॒णीवे॑तु॒ पत्नी᳚ ।
वि॒श्वरू॑पा बृह॒ती चि॒त्रभा॑नुः ।
सा नो॑ य॒ज्ञस्य॑ सुवि॒ते द॑धातु ।
यथा॒ जीवे॑म श॒रद॒स्सवीरा॑ः ।
रो॒हि॒णी दे॒व्युद॑गात्पु॒रस्ता᳚त् ।
विश्वा॑ रू॒पणि॑ प्रति॒मोद॑माना ।
प्र॒जाप॑तिग्ं ह॒विषा॑ व॒र्धय॑न्ती ।
प्रि॒या दे॒वाना॒मुप॑यातु य॒ज्ञम् ॥ 2 ॥

ಮೃಗಶಿರ

सोमो॒ राजा॑ मृगशी॒र्॒षेण॒ आगन्न्॑ ।
शि॒वं नक्ष॑त्रं प्रि॒यम॑स्य॒ धाम॑ ।
आ॒प्याय॑मानो बहु॒धा जने॑षु ।
रेत॑ः प्र॒जां यज॑माने दधातु ।
यत्ते॒ नक्ष॑त्रं मृगशी॒र्॒षमस्ति॑ ।
प्रि॒यग्ं रा॑जन् प्रि॒यत॑मं प्रि॒याणा᳚म् ।
तस्मै॑ ते सोम ह॒विषा॑ विधेम ।
शन्न॑ एधि द्वि॒पदे॒ शं चतु॑ष्पदे ॥ 3 ॥

ಆರ್ದ್ರಾ

आ॒र्द्रया॑ रु॒द्रः प्रथ॑मा न एति ।
श्रेष्ठो॑ दे॒वानां॒ पति॑रघ्नि॒याना᳚म् ।
नक्ष॑त्रमस्य ह॒विषा॑ विधेम ।
मा न॑ः प्र॒जाग्ं री॑रिष॒न्मोत वी॒रान् ।
हे॒ती रु॒द्रस्य॒ परि॑णो वृणक्तु ।
आ॒र्द्रा नक्ष॑त्रं जुषताग्ं ह॒विर्न॑ः ।
प्र॒मु॒ञ्चमा॑नौ दुरि॒तानि॒ विश्वा᳚ ।
अपा॒घशग्ंसन्नुदता॒मरा॑तिम् ॥ 4 ॥

ಪುನರ್ವಸು

पुन॑र्नो दे॒व्यदि॑तिस्पृणोतु ।
पुन॑र्वसून॒ः पुन॒रेतां᳚ य॒ज्ञम् ।
पुन॑र्नो दे॒वा अ॒भिय॑न्तु॒ सर्वे᳚ ।
पुन॑ः पुनर्वो ह॒विषा॑ यजामः ।
ए॒वा न दे॒व्यदि॑तिरन॒र्वा ।
विश्व॑स्य भ॒र्त्री जग॑तः प्रति॒ष्ठा ।
पुन॑र्वसू ह॒विषा॑ व॒र्धय॑न्ती ।
प्रि॒यन्दे॒वाना॒मप्ये॑तु॒ पाथ॑ः ॥ 5 ॥

ಪುಷ್ಯ

बृह॒स्पति॑ः प्रथ॒मं जाय॑मानः ।
ति॒ष्यं॑ नक्ष॑त्रम॒भि सम्ब॑भूव ।
श्रेष्ठो॑ दे॒वानां॒ पृत॑नासु जि॒ष्णुः ।
दि॒शोऽनु॒ सर्वा॒ अभ॑यन्नो अस्तु ।
ति॒ष्य॑ः पु॒रस्ता॑दु॒त म॑ध्य॒तो न॑ः ।
बृह॒स्पति॑र्न॒ः परि॑पातु प॒श्चात् ।
बाधे॑ता॒न्द्वेषो॒ अभ॑यं कृणुताम् ।
सु॒वीर्य॑स्य॒ पत॑यस्याम ॥ 6 ॥

ಆಶ್ಲೇಷಾ

इ॒दग्ं स॒र्पेभ्यो॑ ह॒विर॑स्तु॒ जुष्टम्᳚ ।
आ॒श्रे॒षा येषा॑मनु॒यन्ति॒ चेत॑ः ।
ये अ॒न्तरि॑क्षं पृथि॒वीं क्षि॒यन्ति॑ ।
ते न॑स्स॒र्पासो॒ हव॒माग॑मिष्ठाः ।
ये रो॑च॒ने सूर्य॒स्यापि॑ स॒र्पाः ।
ये दिवं॑ दे॒वीमनु॑स॒ञ्चर॑न्ति ।
येषा॑माश्रे॒षा अ॑नु॒यन्ति॒ कामम्᳚ ।
तेभ्य॑स्स॒र्पेभ्यो॒ मधु॑मज्जुहोमि ॥ 7 ॥

ಮಘಾ

उप॑हूताः पि॒तरो॒ ये म॒घासु॑ ।
मनो॑जवसस्सु॒कृत॑स्सुकृ॒त्याः ।
ते नो॒ नक्ष॑त्रे॒ हव॒माग॑मिष्ठाः ।
स्व॒धाभि॑र्य॒ज्ञं प्रय॑तं जुषन्ताम् ।
ये अ॑ग्निद॒ग्धा येऽन॑ग्निदग्धाः ।
ये॑ऽमुं लो॒कं पि॒तर॑ः क्षि॒यन्ति॑ ।
याग्ंश्च॑ वि॒द्मयाग्ं उ॑ च॒ न प्र॑वि॒द्म ।
म॒घासु॑ य॒ज्ञग्ं सुकृ॑तम् जुषन्ताम् ॥ 8 ॥

ಪೂರ್ವ ಫಲ್ಗುನೀ

गवां॒ पति॒ः फल्गु॑नीनामसि॒ त्वम् ।
तद॑र्यमन्वरुणमित्र॒ चारु॑ ।
तं त्वा॑ व॒यग्ं स॑नि॒तारग्ं॑ सनी॒नाम् ।
जी॒वा जीव॑न्त॒मुप॒ संवि॑शेम ।
येने॒मा विश्वा॒ भुव॑नानि॒ सञ्जि॑ता ।
यस्य॑ दे॒वा अ॑नुस॒म्यन्ति॒ चेत॑ः ।
अ॒र्य॒मा राजा॒ऽजर॒स्तु वि॑ष्मान् ।
फल्गु॑नीनामृष॒भो रो॑रवीति ॥ 9 ॥

ಉತ್ತರ ಫಲ್ಗುನೀ

श्रेष्ठो॑ दे॒वानां᳚ भगवो भगासि ।
तत्त्वा॑ विदु॒ः फल्गु॑नी॒स्तस्य॑ वित्तात् ।
अ॒स्मभ्यं॑ क्ष॒त्रम॒जरग्ं॑ सु॒वीर्यम्᳚ ।
गोम॒दश्व॑व॒दुप॒सन्नु॑दे॒ह ।
भगो॑ह दा॒ता भग इत्प्र॑दा॒ता ।
भगो॑ दे॒वीः फल्गु॑नी॒रावि॑वेश ।
भग॒स्येत्तं प्र॑स॒वङ्ग॑मेम ।
यत्र॑ दे॒वैस्स॑ध॒मादं॑ मदेम ॥ 10 ॥

ಹಸ್ತ

आया॒तु दे॒वस्स॑वि॒तोप॑यातु ।
हि॒र॒ण्यये॑न सु॒वृता॒ रथे॑न ।
वह॒न्॒ हस्तग्ं॑ सुभगं॑ विद्म॒नाप॑सम् ।
प्रयच्छ॑न्तं॒ पपु॑रिं॒ पुण्य॒मच्छ॑ ।
हस्त॒ः प्रय॑च्छ त्व॒मृतं॒ वसी॑यः ।
दक्षि॑णेन॒ प्रति॑गृभ्णीम एनत् ।
दा॒तार॑म॒द्य स॑वि॒ता वि॑देय ।
यो नो॒ हस्ता॑य प्रसु॒वाति॑ य॒ज्ञम् ॥ 11 ॥

ಚಿತ್ರಾ

त्वष्टा॒ नक्ष॑त्रम॒भ्ये॑ति चि॒त्राम् ।
शु॒भग्ं स॑सम्युव॒तिग्ं रोच॑मानाम् ।
नि॒वे॒शय॑न्न॒मृता॒न्मर्त्याग्॑श्च ।
रू॒पाणि॑ पि॒ग्ं॒शन्भुव॑नानि॒ विश्वा᳚ ।
तन्न॒स्त्वष्टा॒ तदु॑ चि॒त्रा विच॑ष्टाम् ।
तन्नक्ष॑त्रं भूरि॒दा अ॑स्तु॒ मह्यम्᳚ ।
तन्न॑ः प्र॒जां वी॒रव॑तीग्ं सनोतु ।
गोभि॑र्नो॒ अश्वै॒स्सम॑नक्तु यज्ञम् ॥ 12 ॥

ಸ್ವಾತೀ

वा॒युर्नक्ष॑त्रम॒भ्ये॑ति॒ निष्ट्या᳚म् ।
ति॒ग्मशृ॑ङ्गो वृष॒भो रोरु॑वाणः ।
स॒मी॒रय॒न्भुव॑ना मात॒रिश्वा᳚ ।
अप॒ द्वेषाग्ं॑सि नुदता॒मरा॑तीः ।
तन्नो॑ वा॒यस्तदु॒ निष्ट्या॑ शृणोतु ।
तन्नक्ष॑त्रं भूरि॒दा अ॑स्तु॒ मह्यम्᳚ ।
तन्नो॑ दे॒वासो॒ अनु॑जानन्तु॒ कामम्᳚ ।
यथा॒ तरे॑म दुरि॒तानि॒ विश्वा᳚ ॥ 13 ॥

ವಿಶಾಖಾ

दू॒रम॒स्मच्छत्र॑वो यन्तु भी॒ताः ।
तदि॑न्द्रा॒ग्नी कृ॑णुतां॒ तद्विशा॑खे ।
तन्नो॑ दे॒वा अनु॑मदन्तु य॒ज्ञम् ।
प॒श्चात् पु॒रस्ता॒दभ॑यन्नो अस्तु ।
नक्ष॑त्राणा॒मधि॑पत्नी॒ विशा॑खे ।
श्रेष्ठा॑विन्द्रा॒ग्नी भुव॑नस्य गो॒पौ ।
विषू॑च॒श्शत्रू॑नप॒बाध॑मानौ ।
अप॒क्षुध॑न्नुदता॒मरा॑तिम् ॥ 14 ॥

ಪೂರ್ಣಿಮಾ

पू॒र्णा प॒श्चादु॒त पू॒र्णा पु॒रस्ता᳚त् ।
उन्म॑ध्य॒तः पौ᳚र्णमा॒सी जि॑गाय ।
तस्यां᳚ दे॒वा अधि॑सं॒वस॑न्तः ।
उ॒त्त॒मे नाक॑ इ॒ह मा॑दयन्ताम् ।
पृ॒थ्वी सु॒वर्चा॑ युव॒तिस्स॒जोषा᳚ः ।
पौ॒र्ण॒मा॒स्युद॑गा॒च्छोभ॑माना ।
आ॒प्या॒यय॑न्ती दुरि॒तानि॒ विश्वा᳚ ।
उ॒रुं दुहां॒ यज॑मानाय य॒ज्ञम् ॥ 15 ॥

ಅನುರಾಧಾ

ऋ॒द्ध्यास्म॑ ह॒व्यैर्नम॑सो॒पसद्य॑ ।
मि॒त्रं दे॒वं मि॑त्र॒धेय॑न्नो अस्तु ।
अ॒नू॒रा॒धान् ह॒विषा॑ व॒र्धय॑न्तः ।
श॒तं जी॑वेम॒ श॒रद॒स्सवी॑राः ।
चि॒त्रं नक्ष॑त्र॒मुद॑गात्पु॒रस्ता᳚त् ।
अ॒नू॒रा॒धा स॒ इति॒ यद्वद॑न्ति ।
तन्मि॒त्र ए॑ति प॒थिभि॑र्देव॒यानै᳚ः ।
हि॒र॒ण्ययै॒र्वित॑तैर॒न्तरि॑क्षे ॥ 16 ॥

ಜ್ಯೇಷ್ಠಾ

इन्द्रो᳚ ज्ये॒ष्ठामनु॒ नक्ष॑त्रमेति ।
यस्मि॑न् वृ॒त्रं वृ॑त्र॒ तूर्यो॑ त॒तार॑ ।
तस्मि॑न्व॒यम॒मृतं॒ दुहा॑नाः ।
क्षुध॑न्तरेम॒ दुरि॑तिं॒ दुरि॑ष्टिम् ।
पु॒र॒न्द॒राय॑ वृष॒भाय॑ धृ॒ष्णवे᳚ ।
अषा॑ढाय॒ सह॑मानाय मी॒ढुषे᳚ ।
इन्द्रा॑य ज्ये॒ष्ठा मधु॑म॒द्दुहा॑ना ।
उ॒रुं कृ॑णोतु॒ यज॑मानाय लो॒कम् ॥ 17 ॥

ಮೂಲಾ

मूलं॑ प्र॒जां वी॒रव॑तीं विदेय ।
परा᳚च्येतु॒ निर्ऋ॑तिः परा॒चा ।
गोभि॒र्नक्ष॑त्रं प॒शुभि॒स्सम॑क्तम् ।
अह॑र्भूया॒द्यज॑मानाय॒ मह्यम्᳚ ।
अह॑र्नो अ॒द्य सु॑वि॒ते द॑दातु ।
मूलं॒ नक्ष॑त्र॒मिति॒ यद्वद॑न्ति ।
परा॑चीं वा॒चा निर्ऋ॑तिं नुदामि ।
शि॒वं प्र॒जयै॑ शि॒वम॑स्तु॒ मह्यम्᳚ ॥ 18 ॥

ಪೂರ್ವಾಷಾಢಾ

या दि॒व्या आप॒ः पय॑सा सम्बभू॒वुः ।
या अ॒न्तरि॑क्ष उ॒त पार्थि॑वी॒र्याः ।
यासा॑मषा॒ढा अ॑नु॒यन्ति॒ कामम्᳚ ।
ता न॒ आप॒श्शग्ग् स्यो॒ना भ॑वन्तु ।
याश्च॒ कूप्या॒ याश्च॑ ना॒द्या᳚स्समु॒द्रिया᳚ः ।
याश्च॑ वैश॒न्तीरुत प्रा॑स॒चीर्याः ।
यासा॑मषा॒ढा मधु॑ भ॒क्षय॑न्ति ।
ता न॒ आप॒श्शग्ग् स्यो॒ना भ॑वन्तु ॥ 19 ॥

ಉತ್ತರಾಷಾಢಾ

तन्नो॒ विश्वे॒ उप॑ शृण्वन्तु दे॒वाः ।
तद॑षा॒ढा अ॒भिसम्य॑न्तु य॒ज्ञम् ।
तन्नक्ष॑त्रं प्रथतां प॒शुभ्य॑ः ।
कृ॒षिर्वृ॒ष्टिर्यज॑मानाय कल्पताम् ।
शु॒भ्राः क॒न्या॑ युव॒तय॑स्सु॒पेश॑सः ।
क॒र्म॒कृत॑स्सु॒कृतो॑ वी॒र्या॑वतीः ।
विश्वा᳚न् दे॒वान् ह॒विषा॑ व॒र्धय॑न्तीः ।
अ॒षा॒ढाः काम॒मुप॑यान्तु य॒ज्ञम् ॥ 20 ॥

ಅಭಿಜಿತ್

यस्मि॒न् ब्रह्मा॒भ्यज॑य॒त्सर्व॑मे॒तत् ।
अ॒मुञ्च॑ लो॒कमि॒दमू॑च॒ सर्वम्᳚ ।
तन्नो॒ नक्ष॑त्रमभि॒जिद्वि॒जित्य॑ ।
श्रियं॑ दधा॒त्वहृ॑णीयमानम् ।
उ॒भौ लो॒कौ ब्रह्म॑णा॒ सञ्जि॑ते॒मौ ।
तन्नो॒ नक्ष॑त्रमभि॒जिद्विच॑ष्टाम् ।
तस्मि॑न्व॒यं पृत॑ना॒स्सञ्ज॑येम ।
तन्नो॑ दे॒वासो॒ अनु॑जानन्तु॒ कामम्᳚ ॥ 21 ॥

ಶ್ರವಣ

शृ॒ण्वन्ति॑ श्रो॒णाम॒मृत॑स्य गो॒पाम् ।
पुण्या॑मस्या॒ उप॑शृणोमि॒ वाचम्᳚ ।
म॒हीं दे॒वीं विष्णु॑पत्नीमजू॒र्याम् ।
प्र॒तीची॑ मेनाग्ं ह॒विषा॑ यजामः ।
त्रे॒धा विष्णु॑रुरुगा॒यो विच॑क्रमे ।
म॒हीं दिवं॑ पृथि॒वीम॒न्तरि॑क्षम् ।
तच्छ्रो॒णैति॒श्रव॑ इ॒च्छमा॑ना ।
पुण्य॒ग्ग्॒ श्लोकं॒ यज॑मानाय कृण्व॒ती ॥ 22 ॥

ಧನಿಷ್ಠಾ

अ॒ष्टौ दे॒वा वस॑वस्सो॒म्यास॑ः ।
चत॑स्रो दे॒वीर॒जरा॒ः श्रवि॑ष्ठाः ।
ते य॒ज्ञं पा᳚न्तु॒ रज॑सः प॒रस्ता᳚त् ।
सं॒व॒थ्स॒रीण॑म॒मृतग्ग्॑ स्व॒स्ति ।
य॒ज्ञं न॑ः पान्तु॒ वस॑वः पु॒रस्ता᳚त् ।
द॒क्षि॒ण॒तो॑ऽभिय॑न्तु॒ श्रवि॑ष्ठाः ।
पुण्यं॒ नक्ष॑त्रम॒भि संवि॑शाम ।
मा नो॒ अरा॑तिर॒घश॒ग्ं॒साऽगन्न्॑ ॥ 23 ॥

ಶತಭಿಷಕ್

क्ष॒त्रस्य॒ राजा॒ वरु॑णोऽधिरा॒जः ।
नक्ष॑त्राणाग्ं श॒तभि॑ष॒ग्वसि॑ष्ठः ।
तौ दे॒वेभ्य॑ः कृणुतो दी॒र्घमायु॑ः ।
श॒तग्ं स॒हस्रा॑ भेष॒जानि॑ धत्तः ।
य॒ज्ञन्नो॒ राजा॒ वरु॑ण॒ उप॑यातु ।
तन्नो॒ विश्वे॑ अ॒भि सम्य॑न्तु दे॒वाः ।
तन्नो॒ नक्ष॑त्रग्ं श॒तभि॑षग्जुषा॒णम् ।
दी॒र्घमायु॒ः प्रति॑रद्भेष॒जानि॑ ॥ 24 ॥

ಪೂರ್ವಾಭಾದ್ರಪದಾ

अ॒ज एक॑पा॒दुद॑गात्पु॒रस्ता᳚त् ।
विश्वा॑ भू॒तानि॑ प्रति॒ मोद॑मानः ।
तस्य॑ दे॒वाः प्र॑स॒वं य॑न्ति॒ सर्वे᳚ ।
प्रो॒ष्ठ॒प॒दासो॑ अ॒मृत॑स्य गो॒पाः ।
वि॒भ्राज॑मानस्समिधा॒ न उ॒ग्रः ।
आऽन्तरि॑क्षमरुह॒दग॒न्द्याम् ।
तग्ं सूर्यं॑ दे॒वम॒जमेक॑पादम् ।
प्रो॒ष्ठ॒प॒दासो॒ अनु॑यन्ति॒ सर्वे᳚ ॥ 25 ॥

ಉತ್ತರಾಭಾದ್ರಪದಾ

अहि॑र्बु॒ध्निय॒ः प्रथ॑मा न एति ।
श्रेष्ठो॑ दे॒वाना॑मु॒त मानु॑षाणाम् ।
तं ब्रा᳚ह्म॒णास्सो॑म॒पास्सो॒म्यास॑ः ।
प्रो॒ष्ठ॒प॒दासो॑ अ॒भिर॑क्षन्ति॒ सर्वे᳚ ।
च॒त्वार॒ एक॑म॒भि कर्म॑ दे॒वाः ।
प्रो॒ष्ठ॒प॒दा स॒ इति॒ यान् वद॑न्ति ।
ते बु॒ध्नियं॑ परि॒षद्यग्ग्॑ स्तु॒वन्त॑ः ।
अहिग्ं॑ रक्षन्ति॒ नम॑सोप॒सद्य॑ ॥ 26 ॥

ರೇವತೀ

पू॒षा रे॒वत्यन्वे॑ति॒ पन्था᳚म् ।
पु॒ष्टि॒पती॑ पशु॒पा वाज॑बस्त्यौ ।
इ॒मानि॑ ह॒व्या प्रय॑ता जुषा॒णा ।
सु॒गैर्नो॒ यानै॒रुप॑यातां य॒ज्ञम् ।
क्षु॒द्रान् प॒शून् र॑क्षतु रे॒वती॑ नः ।
गावो॑ नो॒ अश्वा॒ग्ं॒ अन्वे॑तु पू॒षा ।
अन्न॒ग्ं॒ रक्ष॑न्तौ बहु॒दा विरू॑पम् ।
वाजग्ं॑ सनुतां॒ यज॑मानाय य॒ज्ञम् ॥ 27 ॥

ಅಶ್ವಿನೀ

तद॒श्विना॑वश्व॒युजोप॑याताम् ।
शुभ॒ङ्गमि॑ष्ठौ सु॒यमे॑भि॒रश्वै᳚ः ।
स्वं नक्ष॑त्रग्ं ह॒विषा॒ यज॑न्तौ ।
मध्वा॒सम्पृ॑क्तौ॒ यजु॑षा॒ सम॑क्तौ ।
यौ दे॒वानां᳚ भि॒षजौ॑ हव्यवा॒हौ ।
विश्व॑स्य दू॒ताव॒मृत॑स्य गो॒पौ ।
तौ नक्ष॒त्रं जुजुषा॒णोप॑याताम् ।
नमो॒ऽश्विभ्यां᳚ कृणुमोऽश्व॒युग्भ्या᳚म् ॥ 28 ॥

ಭರಣೀ

अप॑ पा॒प्मानं॒ भर॑णीर्भरन्तु ।
तद्य॒मो राजा॒ भग॑वा॒न्॒ विच॑ष्टाम् ।
लो॒कस्य॒ राजा॑ मह॒तो म॒हान् हि ।
सु॒गं न॒ः पन्था॒मभ॑यं कृणोतु ।
यस्मि॒न्नक्ष॑त्रे य॒म एति॒ राजा᳚ ।
यस्मि॑न्नेनम॒भ्यषि॑ञ्चन्त दे॒वाः ।
तद॑स्य चि॒त्रग्ं ह॒विषा॑ यजाम ।
अप॑ पा॒प्मानं॒ भर॑णीर्भरन्तु ॥ 29 ॥

ಕೃಷ್ಣ ಚತುರ್ದಶೀ

नि॒वेश॑नी स॒ङ्गम॑नी॒ वसू॑नां॒ विश्वा॑ रू॒पाणि॒ वसू᳚न्यावे॒शय॑न्ती ।
स॒ह॒स्र॒पो॒षग्ं सु॒भगा॒ ररा॑णा॒ सा न॒ आग॒न्॒ वर्च॑सा संविदा॒ना ॥ 30 ॥

ಅಮಾವಾಸ್ಯಾ

यत्ते॑ दे॒वा अद॑धुर्भाग॒धेय॒ममा॑वास्ये सं॒वस॑न्तो महि॒त्वा ।
सा नो॑ य॒ज्ञं पि॑पृहि विश्ववारे र॒यिन्नो॑ धेहि सुभगे सु॒वीरम्᳚ ।
ॐ शान्ति॒ः शान्ति॒ः शान्ति॑ः ॥

a̱gnirnáḥ pātu̱ kṛttíkāḥ |
nakṣátraṃ de̱vamíndri̱yam |
i̱damā́sāṃ vicakṣa̱ṇam |
ha̱virā̱saṃ júhotana |
yasya̱ bhāntí ra̱śmayo̱ yasyá ke̱taváḥ |
yasye̱mā viśvā̱ bhuvánāni̱ sarvā̋ |
sa kṛttíkābhira̱bhisa̱ṃvasā́naḥ |
a̱gnirnó de̱vassúvi̱te dádhātu || 1 ||

ರೋಹಿಣೀ

pra̱jāpáte rohi̱ṇīvétu̱ patnī̋ |
vi̱śvarū́pā bṛha̱tī ci̱trabhā́nuḥ |
sā nó ya̱jñasyá suvi̱te dádhātu |
yathā̱ jīvéma śa̱rada̱ssavīrā́ḥ |
ro̱hi̱ṇī de̱vyudágātpu̱rastā̋t |
viśvā́ rū̱paṇí prati̱modámānā |
pra̱jāpátigṃ ha̱viṣā́ va̱rdhayántī |
pri̱yā de̱vānā̱mupáyātu ya̱jñam || 2 ||

ಮೃಗಶಿರ

somo̱ rājā́ mṛgaśī̱̱rṣeṇa̱ āgánn |
śi̱vaṃ nakṣátraṃ pri̱yamásya̱ dhāmá |
ā̱pyāyámāno bahu̱dhā janéṣu |
retáḥ pra̱jāṃ yajámāne dadhātu |
yatte̱ nakṣátraṃ mṛgaśī̱̱rṣamastí |
pri̱yagṃ rā́jan pri̱yatámaṃ pri̱yāṇā̋m |
tasmaí te soma ha̱viṣā́ vidhema |
śanná edhi dvi̱pade̱ śaṃ catúṣpade || 3 ||

ಆರ್ದ್ರಾ

ā̱rdrayā́ ru̱draḥ prathámā na eti |
śreṣṭhó de̱vānā̱ṃ patíraghni̱yānā̋m |
nakṣátramasya ha̱viṣā́ vidhema |
mā náḥ pra̱jāgṃ rī́riṣa̱nmota vī̱rān |
he̱tī ru̱drasya̱ paríṇo vṛṇaktu |
ā̱rdrā nakṣátraṃ juṣatāgṃ ha̱virnáḥ |
pra̱mu̱ñcamā́nau duri̱tāni̱ viśvā̋ |
apā̱ghaśagṃsannudatā̱marā́tim || 4 ||

ಪುನರ್ವಸು

punárno de̱vyadítispṛṇotu |
punárvasūna̱ḥ puna̱retā̋ṃ ya̱jñam |
punárno de̱vā a̱bhiyántu̱ sarve̋ |
punáḥ punarvo ha̱viṣā́ yajāmaḥ |
e̱vā na de̱vyadítirana̱rvā |
viśvásya bha̱rtrī jagátaḥ prati̱ṣṭhā |
punárvasū ha̱viṣā́ va̱rdhayántī |
pri̱yande̱vānā̱mapyétu̱ pātháḥ || 5 ||

ಪುಷ್ಯ

bṛha̱spatíḥ pratha̱maṃ jāyámānaḥ |
ti̱ṣyáṃ nakṣátrama̱bhi sambábhūva |
śreṣṭhó de̱vānā̱ṃ pṛtánāsu ji̱ṣṇuḥ |
di̱śo’nu̱ sarvā̱ abháyanno astu |
ti̱ṣyáḥ pu̱rastā́du̱ta mádhya̱to náḥ |
bṛha̱spatírna̱ḥ parípātu pa̱ścāt |
bādhétā̱ndveṣo̱ abháyaṃ kṛṇutām |
su̱vīryásya̱ patáyasyāma || 6 ||

ಆಶ್ಲೇಷಾ

i̱dagṃ sa̱rpebhyó ha̱virástu̱ juṣṭa̋m |
ā̱śre̱ṣā yeṣā́manu̱yanti̱ cetáḥ |
ye a̱ntaríkṣaṃ pṛthi̱vīṃ kṣi̱yantí |
te nássa̱rpāso̱ hava̱māgámiṣṭhāḥ |
ye róca̱ne sūrya̱syāpí sa̱rpāḥ |
ye diváṃ de̱vīmanúsa̱ñcaránti |
yeṣā́māśre̱ṣā ánu̱yanti̱ kāma̋m |
tebhyássa̱rpebhyo̱ madhúmajjuhomi || 7 ||

ಮಘಾ

upáhūtāḥ pi̱taro̱ ye ma̱ghāsú |
manójavasassu̱kṛtássukṛ̱tyāḥ |
te no̱ nakṣátre̱ hava̱māgámiṣṭhāḥ |
sva̱dhābhírya̱jñaṃ prayátaṃ juṣantām |
ye ágnida̱gdhā ye’nágnidagdhāḥ |
yé’muṃ lo̱kaṃ pi̱taráḥ kṣi̱yantí |
yāgṃścá vi̱dmayāgṃ ú ca̱ na právi̱dma |
ma̱ghāsú ya̱jñagṃ sukṛ́tam juṣantām || 8 ||

ಪೂರ್ವ ಫಲ್ಗುನೀ

gavā̱ṃ pati̱ḥ phalgúnīnāmasi̱ tvam |
tadáryamanvaruṇamitra̱ cārú |
taṃ tvā́ va̱yagṃ sáni̱tārágṃ sanī̱nām |
jī̱vā jīvánta̱mupa̱ saṃvíśema |
yene̱mā viśvā̱ bhuvánāni̱ sañjítā |
yasyá de̱vā ánusa̱myanti̱ cetáḥ |
a̱rya̱mā rājā̱’jara̱stu víṣmān |
phalgúnīnāmṛṣa̱bho róravīti || 9 ||

ಉತ್ತರ ಫಲ್ಗುನೀ

śreṣṭhó de̱vānā̋ṃ bhagavo bhagāsi |
tattvā́ vidu̱ḥ phalgúnī̱stasyá vittāt |
a̱smabhyáṃ kṣa̱trama̱jarágṃ su̱vīrya̋m |
goma̱daśváva̱dupa̱sannúde̱ha |
bhagóha dā̱tā bhaga itprádā̱tā |
bhagó de̱vīḥ phalgúnī̱rāvíveśa |
bhaga̱syettaṃ prása̱vaṅgámema |
yatrá de̱vaissádha̱mādáṃ madema || 10 ||

ಹಸ್ತ

āyā̱tu de̱vassávi̱topáyātu |
hi̱ra̱ṇyayéna su̱vṛtā̱ rathéna |
vaha̱̱n hastágṃ subhagáṃ vidma̱nāpásam |
prayacchánta̱ṃ papúri̱ṃ puṇya̱macchá |
hasta̱ḥ prayáccha tva̱mṛta̱ṃ vasī́yaḥ |
dakṣíṇena̱ pratígṛbhṇīma enat |
dā̱tāráma̱dya sávi̱tā vídeya |
yo no̱ hastā́ya prasu̱vātí ya̱jñam || 11 ||

ಚಿತ್ರಾ

tvaṣṭā̱ nakṣátrama̱bhyéti ci̱trām |
śu̱bhagṃ sásamyuva̱tigṃ rocámānām |
ni̱ve̱śayánna̱mṛtā̱nmartyā́gśca |
rū̱pāṇí pi̱̱gṃśanbhuvánāni̱ viśvā̋ |
tanna̱stvaṣṭā̱ tadú ci̱trā vicáṣṭām |
tannakṣátraṃ bhūri̱dā ástu̱ mahya̋m |
tannáḥ pra̱jāṃ vī̱ravátīgṃ sanotu |
gobhírno̱ aśvai̱ssamánaktu yajñam || 12 ||

ಸ್ವಾತೀ

vā̱yurnakṣátrama̱bhyéti̱ niṣṭyā̋m |
ti̱gmaśṛ́ṅgo vṛṣa̱bho rorúvāṇaḥ |
sa̱mī̱raya̱nbhuvánā māta̱riśvā̋ |
apa̱ dveṣā́gṃsi nudatā̱marā́tīḥ |
tannó vā̱yastadu̱ niṣṭyā́ śṛṇotu |
tannakṣátraṃ bhūri̱dā ástu̱ mahya̋m |
tannó de̱vāso̱ anújānantu̱ kāma̋m |
yathā̱ taréma duri̱tāni̱ viśvā̋ || 13 ||

ವಿಶಾಖಾ

dū̱rama̱smacchatrávo yantu bhī̱tāḥ |
tadíndrā̱gnī kṛ́ṇutā̱ṃ tadviśā́khe |
tannó de̱vā anúmadantu ya̱jñam |
pa̱ścāt pu̱rastā̱dabháyanno astu |
nakṣátrāṇā̱madhípatnī̱ viśā́khe |
śreṣṭhā́vindrā̱gnī bhuvánasya go̱pau |
viṣū́ca̱śśatrū́napa̱bādhámānau |
apa̱kṣudhánnudatā̱marā́tim || 14 ||

ಪೂರ್ಣಿಮಾ

pū̱rṇā pa̱ścādu̱ta pū̱rṇā pu̱rastā̋t |
unmádhya̱taḥ paűrṇamā̱sī jígāya |
tasyā̋ṃ de̱vā adhísa̱ṃvasántaḥ |
u̱tta̱me nāká i̱ha mā́dayantām |
pṛ̱thvī su̱varcā́ yuva̱tissa̱joṣā̋ḥ |
pau̱rṇa̱mā̱syudágā̱cchobhámānā |
ā̱pyā̱yayántī duri̱tāni̱ viśvā̋ |
u̱ruṃ duhā̱ṃ yajámānāya ya̱jñam || 15 ||

ಅನುರಾಧಾ

ṛ̱ddhyāsmá ha̱vyairnamáso̱pasadyá |
mi̱traṃ de̱vaṃ mítra̱dheyánno astu |
a̱nū̱rā̱dhān ha̱viṣā́ va̱rdhayántaḥ |
śa̱taṃ jī́vema̱ śa̱rada̱ssavī́rāḥ |
ci̱traṃ nakṣátra̱mudágātpu̱rastā̋t |
a̱nū̱rā̱dhā sa̱ iti̱ yadvadánti |
tanmi̱tra éti pa̱thibhírdeva̱yānai̋ḥ |
hi̱ra̱ṇyayai̱rvitátaira̱ntaríkṣe || 16 ||

ಜ್ಯೇಷ್ಠಾ

indrő jye̱ṣṭhāmanu̱ nakṣátrameti |
yasmín vṛ̱traṃ vṛ́tra̱ tūryó ta̱tārá |
tasmínva̱yama̱mṛta̱ṃ duhā́nāḥ |
kṣudhántarema̱ duríti̱ṃ duríṣṭim |
pu̱ra̱nda̱rāyá vṛṣa̱bhāyá dhṛ̱ṣṇave̋ |
aṣā́ḍhāya̱ sahámānāya mī̱ḍhuṣe̋ |
indrā́ya jye̱ṣṭhā madhúma̱dduhā́nā |
u̱ruṃ kṛ́ṇotu̱ yajámānāya lo̱kam || 17 ||

ಮೂಲಾ

mūláṃ pra̱jāṃ vī̱ravátīṃ videya |
parā̋cyetu̱ nirṛ́tiḥ parā̱cā |
gobhi̱rnakṣátraṃ pa̱śubhi̱ssamáktam |
ahárbhūyā̱dyajámānāya̱ mahya̋m |
ahárno a̱dya súvi̱te dádātu |
mūla̱ṃ nakṣátra̱miti̱ yadvadánti |
parā́cīṃ vā̱cā nirṛ́tiṃ nudāmi |
śi̱vaṃ pra̱jayaí śi̱vamástu̱ mahya̋m || 18 ||

ಪೂರ್ವಾಷಾಢಾ

yā di̱vyā āpa̱ḥ payásā sambabhū̱vuḥ |
yā a̱ntaríkṣa u̱ta pārthívī̱ryāḥ |
yāsā́maṣā̱ḍhā ánu̱yanti̱ kāma̋m |
tā na̱ āpa̱śśagg syo̱nā bhávantu |
yāśca̱ kūpyā̱ yāścá nā̱dyā̋ssamu̱driyā̋ḥ |
yāścá vaiśa̱ntīruta prā́sa̱cīryāḥ |
yāsā́maṣā̱ḍhā madhú bha̱kṣayánti |
tā na̱ āpa̱śśagg syo̱nā bhávantu || 19 ||

ಉತ್ತರಾಷಾಢಾ

tanno̱ viśve̱ upá śṛṇvantu de̱vāḥ |
tadáṣā̱ḍhā a̱bhisamyántu ya̱jñam |
tannakṣátraṃ prathatāṃ pa̱śubhyáḥ |
kṛ̱ṣirvṛ̱ṣṭiryajámānāya kalpatām |
śu̱bhrāḥ ka̱nyā́ yuva̱tayássu̱peśásaḥ |
ka̱rma̱kṛtássu̱kṛtó vī̱ryā́vatīḥ |
viśvā̋n de̱vān ha̱viṣā́ va̱rdhayántīḥ |
a̱ṣā̱ḍhāḥ kāma̱mupáyāntu ya̱jñam || 20 ||

ಅಭಿಜಿತ್

yasmi̱n brahmā̱bhyajáya̱tsarváme̱tat |
a̱muñcá lo̱kami̱damū́ca̱ sarva̋m |
tanno̱ nakṣátramabhi̱jidvi̱jityá |
śriyáṃ dadhā̱tvahṛ́ṇīyamānam |
u̱bhau lo̱kau brahmáṇā̱ sañjíte̱mau |
tanno̱ nakṣátramabhi̱jidvicáṣṭām |
tasmínva̱yaṃ pṛtánā̱ssañjáyema |
tannó de̱vāso̱ anújānantu̱ kāma̋m || 21 ||

ಶ್ರವಣ

śṛ̱ṇvantí śro̱ṇāma̱mṛtásya go̱pām |
puṇyā́masyā̱ upáśṛṇomi̱ vāca̋m |
ma̱hīṃ de̱vīṃ viṣṇúpatnīmajū̱ryām |
pra̱tīcī́ menāgṃ ha̱viṣā́ yajāmaḥ |
tre̱dhā viṣṇúrurugā̱yo vicákrame |
ma̱hīṃ diváṃ pṛthi̱vīma̱ntaríkṣam |
tacchro̱ṇaiti̱śravá i̱cchamā́nā |
puṇya̱̱gg śloka̱ṃ yajámānāya kṛṇva̱tī || 22 ||

ಧನಿಷ್ಠಾ

a̱ṣṭau de̱vā vasávasso̱myāsáḥ |
catásro de̱vīra̱jarā̱ḥ śravíṣṭhāḥ |
te ya̱jñaṃ pā̋ntu̱ rajásaḥ pa̱rastā̋t |
sa̱ṃva̱thsa̱rīṇáma̱mṛtágg sva̱sti |
ya̱jñaṃ náḥ pāntu̱ vasávaḥ pu̱rastā̋t |
da̱kṣi̱ṇa̱tó’bhiyántu̱ śravíṣṭhāḥ |
puṇya̱ṃ nakṣátrama̱bhi saṃvíśāma |
mā no̱ arā́tira̱ghaśa̱̱gṃsā’gánn || 23 ||

ಶತಭಿಷಕ್

kṣa̱trasya̱ rājā̱ varúṇo’dhirā̱jaḥ |
nakṣátrāṇāgṃ śa̱tabhíṣa̱gvasíṣṭhaḥ |
tau de̱vebhyáḥ kṛṇuto dī̱rghamāyúḥ |
śa̱tagṃ sa̱hasrā́ bheṣa̱jāní dhattaḥ |
ya̱jñanno̱ rājā̱ varúṇa̱ upáyātu |
tanno̱ viśvé a̱bhi samyántu de̱vāḥ |
tanno̱ nakṣátragṃ śa̱tabhíṣagjuṣā̱ṇam |
dī̱rghamāyu̱ḥ pratíradbheṣa̱jāní || 24 ||

ಪೂರ್ವಾಭಾದ್ರಪದಾ

a̱ja ekápā̱dudágātpu̱rastā̋t |
viśvā́ bhū̱tāní prati̱ modámānaḥ |
tasyá de̱vāḥ prása̱vaṃ yánti̱ sarve̋ |
pro̱ṣṭha̱pa̱dāsó a̱mṛtásya go̱pāḥ |
vi̱bhrājámānassamidhā̱ na u̱graḥ |
ā’ntaríkṣamaruha̱daga̱ndyām |
tagṃ sūryáṃ de̱vama̱jamekápādam |
pro̱ṣṭha̱pa̱dāso̱ anúyanti̱ sarve̋ || 25 ||

ಉತ್ತರಾಭಾದ್ರಪದಾ

ahírbu̱dhniya̱ḥ prathámā na eti |
śreṣṭhó de̱vānā́mu̱ta mānúṣāṇām |
taṃ brā̋hma̱ṇāssóma̱pāsso̱myāsáḥ |
pro̱ṣṭha̱pa̱dāsó a̱bhirákṣanti̱ sarve̋ |
ca̱tvāra̱ ekáma̱bhi karmá de̱vāḥ |
pro̱ṣṭha̱pa̱dā sa̱ iti̱ yān vadánti |
te bu̱dhniyáṃ pari̱ṣadyágg stu̱vantáḥ |
ahígṃ rakṣanti̱ namásopa̱sadyá || 26 ||

ರೇವತೀ

pū̱ṣā re̱vatyanvéti̱ panthā̋m |
pu̱ṣṭi̱patī́ paśu̱pā vājábastyau |
i̱māní ha̱vyā prayátā juṣā̱ṇā |
su̱gairno̱ yānai̱rupáyātāṃ ya̱jñam |
kṣu̱drān pa̱śūn rákṣatu re̱vatī́ naḥ |
gāvó no̱ aśvā̱̱gṃ anvétu pū̱ṣā |
anna̱̱gṃ rakṣántau bahu̱dā virū́pam |
vājágṃ sanutā̱ṃ yajámānāya ya̱jñam || 27 ||

ಅಶ್ವಿನೀ

tada̱śvinā́vaśva̱yujopáyātām |
śubha̱ṅgamíṣṭhau su̱yamébhi̱raśvai̋ḥ |
svaṃ nakṣátragṃ ha̱viṣā̱ yajántau |
madhvā̱sampṛ́ktau̱ yajúṣā̱ samáktau |
yau de̱vānā̋ṃ bhi̱ṣajaú havyavā̱hau |
viśvásya dū̱tāva̱mṛtásya go̱pau |
tau nakṣa̱traṃ jujuṣā̱ṇopáyātām |
namo̱’śvibhyā̋ṃ kṛṇumo’śva̱yugbhyā̋m || 28 ||

ಭರಣೀ

apá pā̱pmāna̱ṃ bharáṇīrbharantu |
tadya̱mo rājā̱ bhagávā̱̱n vicáṣṭām |
lo̱kasya̱ rājā́ maha̱to ma̱hān hi |
su̱gaṃ na̱ḥ panthā̱mabháyaṃ kṛṇotu |
yasmi̱nnakṣátre ya̱ma eti̱ rājā̋ |
yasmínnenama̱bhyaṣíñcanta de̱vāḥ |
tadásya ci̱tragṃ ha̱viṣā́ yajāma |
apá pā̱pmāna̱ṃ bharáṇīrbharantu || 29 ||

ಕೃಷ್ಣ ಚತುರ್ದಶೀ

ni̱veśánī sa̱ṅgamánī̱ vasū́nā̱ṃ viśvā́ rū̱pāṇi̱ vasū̋nyāve̱śayántī |
sa̱ha̱sra̱po̱ṣagṃ su̱bhagā̱ rarā́ṇā̱ sā na̱ āga̱̱n varcásā saṃvidā̱nā || 30 ||

ಅಮಾವಾಸ್ಯಾ

yatté de̱vā adádhurbhāga̱dheya̱mamā́vāsye sa̱ṃvasánto mahi̱tvā |
sā nó ya̱jñaṃ pípṛhi viśvavāre ra̱yinnó dhehi subhage su̱vīra̋m |
oṃ śānti̱ḥ śānti̱ḥ śāntíḥ ||

ನಕ್ಷತ್ರಗಳ ಕ್ರಮ ಇಲ್ಲಿ ಕೃತ್ತಿಕೆಯಿಂದ ಆರಂಭವಾಗುತ್ತದೆ, ಅಶ್ವಿನಿಯಿಂದ ಅಲ್ಲ. ಇದು ಪ್ರಾಚೀನ ಕ್ರಮ; ಆಮೇಲೆ ಜ್ಯೋತಿಷದಲ್ಲಿ ಅಶ್ವಿನಿಯೇ ಮೊದಲಾಯಿತು. ಆ ಬದಲಾವಣೆಗೆ ಕಾರಣ ಆಕಾಶದಲ್ಲಿ ವಸಂತಸಂಪಾತದ ಬಿಂದು ನಿಧಾನವಾಗಿ ಸರಿಯುವುದು. ಅಭಿಜಿತ್ ನಕ್ಷತ್ರ ಇಲ್ಲಿ ಇದೆ; ಇಪ್ಪತ್ತೇಳರ ಪಟ್ಟಿಯಲ್ಲಿ ಅದು ಇರುವುದಿಲ್ಲ. ಪೂರ್ಣಿಮಾ, ಕೃಷ್ಣ ಚತುರ್ದಶೀ ಮತ್ತು ಅಮಾವಾಸ್ಯಾ ನಕ್ಷತ್ರಗಳಲ್ಲ; ತಿಥಿಗಳು. ಇಷ್ಟಿಯ ಕ್ರಮದಲ್ಲಿ ಅವೂ ಸೇರಿವೆ.

The order here begins with Krittika, not with Ashvini. That is the older order; in later astrology Ashvini came first. The change follows from the slow shift of the equinox against the stars. Abhijit is present here, though it does not appear in the list of twenty-seven. Purnima, Krishna Chaturdashi and Amavasya are not stars at all but lunar days; they belong to the rite rather than to the sky-list.

ಸ್ವರಚಿಹ್ನೆಗಳ ಬಗ್ಗೆ: ಅಕ್ಷರದ ಕೆಳಗಿನ ಗೆರೆ ಅನುದಾತ್ತ, ಮೇಲಿನ ಗೆರೆ ಸ್ವರಿತ, ಚಿಹ್ನೆಯಿಲ್ಲದ್ದು ಉದಾತ್ತ. ಪಾಠವನ್ನು ಗುರುಮುಖೇನ ಕಲಿಯುವುದೇ ಸರಿಯಾದ ದಾರಿ; ಈ ಪುಟ ನೆನಪಿಗೆ ಸಹಾಯ ಮಾತ್ರ. · On the accent marks: the line below a syllable is anudatta, the line above is svarita, an unmarked syllable is udatta. The right way to learn the text is from a teacher; this page is only an aid to memory.

ಇಲ್ಲಿ ಯಾವ ನಕ್ಷತ್ರವೂ ಕೆಟ್ಟದ್ದಲ್ಲ. ಪ್ರತಿಯೊಂದಕ್ಕೂ ಒಂದು ದೇವತೆ, ಒಂದು ಪ್ರಾರ್ಥನೆ, ಒಂದು ಆಶೀರ್ವಾದ. ಮೂಲಾ ಮತ್ತು ಆಶ್ಲೇಷೆಯಂತಹ ನಕ್ಷತ್ರಗಳಲ್ಲಿ ಹುಟ್ಟಿದವರ ಬಗ್ಗೆ ಇಂದು ಹೇಳುವ ಮಾತುಗಳನ್ನು ಈ ಮಂತ್ರಗಳು ಬೆಂಬಲಿಸುವುದಿಲ್ಲ. ಮೂಲಾ ನಕ್ಷತ್ರದ ಮಂತ್ರ ಕೇಳುವುದು ಒಂದೇ: ವೀರರಾದ ಸಂತಾನ ಸಿಗಲಿ, ತೊಂದರೆ ದೂರ ಸರಿಯಲಿ. ಹುಟ್ಟಿದ ಮಗುವನ್ನು ಅಶುಭ ಎನ್ನುವ ಯಾವ ಮಾತೂ ಇಲ್ಲಿಲ್ಲ.

No star here is a bad star. Each has a deity, a prayer and a blessing. The things said today about people born under Mula or Ashlesha find no support in these verses. The Mula verse asks for one thing only: strong children, and trouble kept at a distance. There is nothing here that calls a newborn inauspicious.